هل على طول حاسة إن شكل جسمك مش متناسق؟ بطن مش بتنزل؟ أرداف؟ دايماً مرهقة؟ مصدعة؟ مزاجك وحش؟ بتنسي؟ مش مركزة؟ حاسة إن جسمك محوش مياه؟ ميزانك ثابت؟ مهما عملت ... برده مش سعيدة؟ يمكن تكون "هيمنة الأستروجين" هي سبب تعاستك!
أهم هرموناتك!
أهم هرموناتك كست هم الأستروجين والبروجسترون لأنهم بينظموا الدورة الشهرية وبتتغير نسبهم حسب كل مرحلة من مراحلها. ممكن نعتبرهم أختين؛ الأستروجين هو الأخت اللي كلها نشاط وحيوية وقوة، والبروجسترون هو الأخت الهادية اللي بتساعدك تنامي وترتاحي وتجددي نشاطك. لو حصل خلل في النسب ما بينهم، والأستروجين هيمن على جسمك، بدل النشاط والحيوية والقوة هتلاقي نفسك على طول مخنوقة وقرفانة وتعبانة ... على طول حاسة أنك منفوخة وتخينة ... على طول جعانة وحاسة بالوخم.
يعني إيه هيمنة الأستروجين؟
لو البروجسترون نقص عن معدلاته الطبيعية بسبب مرحلة ما قبل انقطاع الطمث أو انقطاع الطمث، الأستروجين هيسيطر على جسمك. السبب التاني هو أنك بتتعرضي لحاجات بتقلد تأثير هرمون الأستروجين في جسمك ... تخيلي إن المكياج ومسحوق الغسيل والبلاستيك ممكن تعمل كدة!
إزاي تغيري من أسلوب حياتك علشان تستعيدي توازن هرموناتك؟
- عالجي التوتر المزمن لأنه بيرفع الكورتيزول (هرمون التوتر) على حساب البروجسترون.
- اظبطي أكلك! أي حاجة في علبة أو كيس ... أي حاجة مصنعة ... أي حاجة فيها دهون مهدرجة ... السكر ... الدقيق الأبيض ... كلهم سبب التعاسة اللي أنت فيها.
- من فضلك نامي! قلة النوم بتضرب الهرمونات وبتجوع وبتخلي جسمك يتمسك بالدهون.
- قومي! اتحركي! الحركة بركة والقعدة لعنة!
تاكلي إيه يساعدك؟
- زودي الألياف من الخضروات والورقيات الخضراء.
- الأطعمة المضادة للالتهاب زي زيت الزيتون، الأسماك وخاصة السالمون، والمكسرات.
- خضروات صديقة للمرأة زي البروكلي، والقرنبيط، والكرنب لأنها بتساعد الكبد على تكسير الأستروجين.
- طبعاً البروتين!
احذري: محاكيات الأستروجين النباتية
- بلاش صويا كتير؛ صويا صوص ... لبن صويا ... بروتين صويا ... لحم مخلوط بصويا ... فول صويا ... القائمة طويلة! خلي بالك!
- تجنبي الشوفان والقمح والشعير!
- بالراحة عالفول السوداني والمكسرات!
مصيبة المواد الكيميائية المحاكية للأستروجين!
المواد الكيميائية المحاكية للأستروجين (وتسمى أيضًا زينو إستروجينات) هي مركبات صناعية أو كيميائية تشبه هرمون الأستروجين في التركيب، وتتسبب في تأثيرات أستروجينية في الجسم عند التعرض لها - يعني خلل في الهرمونات. بالإضافة لهيمنة الأستروجين، التعرض المستمر للمواد دي من أسباب البلوغ المبكر عن البنات، مشاكل الخصوبة عند الرجالة والستات، والعديد من السرطانات المرتبطة بالهرمونات.
طرق التعرض لها:
1 - من خلال جلدك زي منتجات العناية بالبشرة والشعر، المكياج، والكريمات تحتوي على مواد محاكية.
2 - عن طريق الفم زي تناول طعام أو شراب متخزن في بلاستيك، أو ماء ملوث.
3 - عن طريق الاستنشاق زي غبار المنزل، عوادم السيارات، معطرات الجو والشمع.
إزاي تقللي تعرضك للمواد دي؟
في المطبخ والطعام
- استبدلي البلاستيك! استخدمي زجاجات ماء من الزجاج أو خامات مقاومة للصدأ.
- بلاش تسخين الطعام في البلاستيك أبداً (حتى لو كان مكتوب عليه "آمن للميكروويف").
- استخدمي علب وحلل جرانيت أو زجاج أو سيراميك.
- اختاري الأطعمة العضوية لتقليل المبيدات.
- اشربي ماء مُرشح بفلتر جيد.
في الحمام والعناية الشخصية
- اقري الملصقات وتجنبي المنتجات التي تحتوي على:
Parabens، Phthalates، Triclosan، SLS، عطور صناعية (Fragrance)
- اختاري منتجات طبيعية وعضوية معتمدة
- اصنعي منتجاتك بنفسك بسيطة مثل زيت جوز الهند، صودا الخبز، الخل
- استخدمي مزيل عرق طبيعي من غير الألومنيوم والمواد الكيميائية
في البيت
- استخدمي منظفات منزلية طبيعية زي الخل، الصودا، والليمون
- تهوية المنزل يوميًا لتقليل تركيز الملوثات الداخلية
- تجنبي معطرات الجو الصناعية والشموع المعطرة
- اغسلي الملابس الجديدة قبل ارتدائها (فيها مواد كيميائية من التصنيع)
نمط الحياة العام
1 - اختاري ألعاب أطفال من الخشب أو القماش الطبيعي بدلاً من البلاستيك بكل أشكاله
2 - امشي حافية على الأرض لتفريغ الشحنات الكهروستاتيكية
3 - ساعدي الكبد يتخلص من السموم
- الخضروات (بروكلي، قرنبيط، كرنب)
- كمية كافية من الماء
- العبي رياضة واعرقي!
طبعاً مش هينفع تتجنبي كل حاجة لكن اعملي اللي تقدري عليه علشان تخففي السموم على جسمك وغددك وهرموناتك.
اقري القصة دي علشان تتخلصي من لعنة المثالية.
حذاء تحت السرير: قصة المثالية التي سرقت صحتنا
أنا كابتن عبيدة طلعت ولو أنت ست عاوزة تكون قوية، تابع فيديوهاتي وابعتيلي!