"يا كابتن، أنا مش عاوزة أتمرن بأوزان كبيرة علشان مش عاوزة أبقى عندي عضلات شبه الرجالة."
أنا كابتن عبيدة طلعت، ودا أكتر سؤال بيجيلي من البنات والستات في الجيم.
عندهم حق!
علشان نقطع الشك باليقين، هطلب من كل ست خايفة تبقى شبه الرجالة تعمل التحليلين دول في معمل موثوق به: تستوستيرون كلي وتستوستيرون حر.
لو التستوستيرون الكلي طلع ما بين 300-1000 ng/dL، ولو الحر طلع ما بين 50-210 pg/mL يبقى ليكي حق تخافي تعملي عضلات رجالي لأن دي نسب هرمون الذكورة في الرجالة.
راحت الخضة؟
خليني أشرحلك بالراحة!
جسم الستات مختلف عن جسم الرجالة تماماً في تركيبه الهرموني. الرجالة عندهم هرمون التستوستيرون (هرمون الذكورة) بنسبة أعلى بكتير من الستات. والهرمون ده هو اللي بيخلي العضلات تكبر وتظهر بشكل واضح.
الستات عندها نسبة بسيطة جداً من الهرمون ده، فمستحيل لوحدها، من غير ما تاخد منشطات، أن عضلاتها مع التمرين تتضخم زي الرجالة. الستات اللي بتشوفيهم في المسابقات وعندهم عضلات بارزة بياخدوا هرمونات ومنشطات كتير جداً.
ليه تمرينات القوة مفيدة ليكي؟
- بتشد وتنحت جسمك: الجلد من غير عضلات بيترهل، لكن رفع الأثقال بتخلي الجسم مظبوط ومتناسق. مش ضخم، لكن مشدود.
- بتساعدك تفقدي دهون أكتر: العضلات وهي في حالة راحة بتستهلك سعرات حرارية أكتر من الدهون. يعني هتخسي وأنت قعدة، أو نايمة، أو مش بتعملي مجهود.
- بتقوي عضمك: مافيش عضلات، في هشاشة عظام!
- بتحسن شكلك في الهدوم: الجسم المشدود بيظهر أحلى في أي حاجة تلبسيها.
العضلات هتنفعك في إيه في يومك؟
- الحمل والولادة والرضاعة هيكونوا أسهل كتير.
- تشيلي طفلك وتلاعبيه وتجري وراه.
- طاقة طول اليوم
- ثقة بالنفس
نفس العضلات اللي بتستخدميها في حياتك اليومية، التمرين هيقويها بس من غير ما يغير شكلها. تخيلي إنكِ تقفي في طابور وما تحسّيش بتعب في رجليك، أو تقفي عالحوض وظهرك ما يوجعكيش - دي حاجات بسيطة من اللي تمارين القوة هتقدمهالك!
الست المصرية زمان كانت بتشيل وتطلع وتنزل، وتغسل وتعصر بيديها، وتطحن في الرّحى. كانت قوة جسدها جزء من أنوثتها، مش ضدها!
الأوهام اللي لازم تنسيها:
"هبقى ضخمة زي الرجالة!"
❌ غلط! جسم الست مش بيتضخم بسهولة، محتاج هرمونات ومجهود كبير جداً.
"تمارين القوة دي للرجالة بس!"
❌ غلط! الستات طول عمرهم أقوياء جسدياً في البيت والغيط والمصنع!
"أنا عايزة أبقى ناعمة ورقيقة!"
❌ القوة مش معناها استرجال! القوة معناها جسم مشدود، صحي، وقادر يخدمكِ طول حياتك.
ازاي تبتدي بأمان:
- ابتدي بوزن الجسم أو وزن خفيف
- ركزى على التكنيك وأن الحركة تكون صح
- استعيني بمدرب في البداية عشان يساعدك ببرنامج مناسب لقدراتك وأهدافك
- كوني صبورة لأن النتايج بتاخد وقت
- انبسطي!
الست القوية بتعرف تحمي نفسها، بتقدر تتحمّل مسئولياتها، وبتكون واثقة في جسمها وقدراتها.
اكتبي قصة قوتك! وافتكري ... الأنوثة الحقيقية مش في الضعف، لكن في القوة واختيارك امتى تستخدميها!
أنا كابتن عبيدة طلعت ولو أنت ست عاوزة تكون قوية، تابع فيديوهاتي وابعتيلي!
#تستوستيرون #testosterone #onlinecoaching #workout #سلسلة__راجل_من_حديد
دي مواضيع تانية على الموقع هتساعدك في رحلتك:
- حذاء تحت السرير: قصة المثالية التي سرقت صحتنا
- خدعة عسكرية تقضي على عذر عدم وجود وقت للجيم والتمرين!
- الخريطة الذرية: كيف تبني عادة الذهاب للجيم خطوة بخطوة!
- تستيقظ مرهقاً وتنام بصعوبة؟ دليل عملي لكسر دائرة الضغوط والتوتر!
- من السرير إلى القمّة: عن النوم المنتظم أتحدث!
أنا كابتن عبيدة طلعت ولو أنت راجل فوق الـ30، تابع فيديوهاتي وابعتلي!